Í samhendu eru allar fjórar ljóðlínurnar stýfðar og ríma þær allar saman. Hver ljóðlína samanstendur af fjórum bragliðum. Stuðlasetning er hefðbundin. Stuðull verður að vera í þriðja braglið fyrstu og þriðju ljóðlínu og höfuðstafur verður að vera í fyrsta braglið annarar og fjórðu ljóðlínu.

Vanda/samt er / sjómanns / fag,
sigla og / stýra / nótt og / dag.
Þeir, sem / stjórna / þjóðar/hag,
þekkja / varla / ára/lag.

Örn Arnar (Magnús Stefánsson)

Hagkveðlingaháttur er án efa vinsælasta rímafbrigði samhendu og yfir höfuð einn vinsælasti háttur vísna enn í dag.

Þegar á / skútu / fékk sér / far,
fylli/rútum / mjög af / bar,
fiski/hnút af / færi / skar,
frægur / stútungs/bani / var.

Örn Arnar (Magnús Stefánsson)

Samhenda hefur lengi verið vinsæl og er enn. Dýrar og snjallar verður vart ort en í eftirfarandi vísu:

Snauður, / þjáður / bað um / brauð,
brauði / ráða / hóðug / gauð,
gauð, sem / dáðu / aðeins / auð,
auð, sem / smáði / þjóðar / nauð.

Örn Arnar (Magnús Stefánsson)

Vísnadæmin þrjú hér að ofan eru öll úr Rímum af Oddi sterka.

Samhenda er á engann hátt frábrugðin gagaraljóðum og stafhendu hvað skipan bragliða varðar. Það mætti reyndar líta á þessa hætti sem þrjú mismunandi rímafbrigði við sama rímnahátt.