Í löngum ljóðlínum eru stundum tveir bragliðir á milli stuðla. Í dæminu hér að neðan eru sex bragliðir í fyrstu og þriðju línu og verða annar bragliðurinn og sá þriðji áhersluléttir. Fjórði bragliðurinn fær hins vegar aukna áherslu.

En / krakkar / eiga að / lúlla og / konur / þurfa / hlé,
og / kannski / verður / hringt í / mömmu / þína,
já, / þú átt / stóran / pabba, er / þrýtur / aldrei / fé,
en / þolir / ekki / kelling/una / sína.

Guðmundur Sigurðsson

Reyndar má líta á þetta þannig, að bragliðir séu færri og koma þá bragliðir með fjórum atkvæðum til sögunnar, það er tvöfaldir tvíliðir.

En / krakkar eiga að / lúlla og / konur þurfa / hlé,

Eftirfarandi dæmi sýnir bragliði með fjórum atkvæðum.

Krummi upp í / hæðardragi / kroppar úldið / bein
á / klettadrangi / vellir spóinn / glaður,
kind með sína / tvílembinga / kúrir bak við / stein
keyrir veginn / fullur sveita/maður.

Hákon Aðalsteinsson

Sé litið á löngu bragliðina sem tvo tvíliði eru þrír bragliðir á milli stuðla, annars bara einn.

Í fornum háttum, til dæmis fornyrðislagi, er algengt, að fleiri en einn bragliður sé á milli stuðla.

Næmt brageyra þarf til að yrkja undir háttum sem þessum og erfitt er að varpa fram haldgóðum reglum um þá.